John 10

Emi Nu Zhin Kniknayi Manayi

1“Ma gna fye gaiciya, oza nwo to lo aknigbe nna bokunmin, ama wa gun nyakunpa nu wa lo dna fye-a, wo zhin evi nu. 2Oza nwo zhin kniknayi, wo zhin wa lo dna nna bokunmi nu.

3“Abokunmi guyi zhin wa gu wo aba ya, akni zhin ɓa wo ʼwo begye, ɓa ɓe dawo wa yi ɓa nɓa aye yi, wa kna ɓa njesun. 4Wa duya gyi nɓa bye, ɓa vi wo, ntuge ɓa kpe wo begye ye. 5Ɓa ta vi zhiɓeyi m, ama sai ɓa bu wosi, ntuge ɓa to shin wo begye wom.”

6Aza nɓa ɓei wo ɓeda ye nyi, ɓa to ɓei kpe kwo awyegam, ntuge Yesu ɓo da ɓeye n nanyiɓesi-siyi nu. 7Ntu cenu, Yesu wa kna ɓa awyeya, wa gna ɓa ge, Omi nu zhin abokun-mi akni nya. 8Aza vinya nɓa ɓo ɓe nmi abye nyi, ɓa zhin avi nu. Ama omi aknigaiciya nya to wo ɓam. 9Omi nu zhin abokunmi. Zaho-zahoi nwa lo nna bokunmi ye wo a pwo, wo ɓa gmi woi lo, woi ɓa bwa nyagyi manayi wa gyi. 10Evi zhin wa lo oza puwa ntuge wa wyi vi, wa wu za, wa wun anyaya. Ama ma ɓe ge ɓa bwa wye-wyeyi, ɓa bwa ko nmwa.

11Omi nu zhin kniknayi Manayi, Kniknayi Manayi zhin wa ga Wohin wye-wyeyi ntu nakni ɓo. 12Oza nwo kna akni, ntu lada ɓo nu kawai, wo to zhin kniknayi num. Esa nu wa gye cam-cam kwoi ɓe ntuge kwa wan akni, wo zhin wa busi, wa fa akni ntuge ɓa to zhin ʼwa nya num, woi to zhin ɓa knayi num. Cam-cam hi ɓa mi kwa lo dna ɓa, kwa gna ɓa miya. 13Wo zhin wa busi, ntuge wo zhin tnu-tnu lada nya nu. Wo ta gye wo anuwan nna kni yim.

14Omi nu zhin Kniknayi Manayi, Mi kpe omi akni ye, omi akni ɓai kpe mi ye. 15Ngye shi Dada kpe mi ye nyi Mihin ce mi-i kpe Dada ye, Mi la mihin wye-wyeyi ga ntu akni ɓo. 16Mi akni do yi lo, nɓa to fi lo n gwodo yem. Tile nu ma ɓe nɓai, ntuge ɓa wo mi begye, ɓa ze gwodo gmanyi, Kniknayi gmanyi.

17Dada wo ye mi, ntuge mi la mihin wye-wyeyi ga, Ma je kwo bwa njesun. 18Zaho-zahoi ta mi wa wu mim, akpe ma ye. Omi nu ga mihin tukwo. Ntuge mi iko yi lo ma ga kwo esa nma ye njesun ma gwo kwo esa nma ye. Gama, Dada la iko ye ga mi.

19Shi wo ɓo da lo nu, Ayahudiyi ɓa gnaje ngun aba dna nɓa shawara tu nwo tukwo. 20Azaho ɓa gna, wo na zafun nukwoyi lo ko wo la cenya nu. Fye ze nwuna fyei kna oza deye pya ɓeda tnubua?

21Ama azaho ɓa gna ge, “aɓede ye to wo lo ngye oza nu nwo nazafun nukwoyi m. Zafun nukwoyi ɓa mi kwa kpe wyebuayi awye ya?”

Gnayi Pei-pei

22Nsayi awyefan tukwoga nya kwoi la si dna n Urushelima. Vinyiko sa nu ɓei. 23Yesu woi gni woi zan nna aduwa nyakun n Solomon a shiragyi. 24Ayahudiyi ɓa ɓe ɓa ku she wo gun, ɓa ci ge, “Har knisayi nu n ho ɓa fa yi fi n jejeʼa? Ngye ho zhin Kristi nu, gna yi pei-pei.”

25Yesu wa dna ɓa begbe wa gna ge, “Mi ku gaiciya gna fye ama fye to ga gaiciyam. Aɓo wo-woyi n mi zhin dna nmi Dada eye nyi, oɓa nu ci mi saida. 26Ama fye ta ga mi gaiciya lon, ntuge fye to zhin omi akni num. 27Omi akni kpe mi begye ye, Mihin mi kpe ɓa ye, ɓa zhin ɓa vi mi. 28Mi ga ɓa wye-wyeyi nyalo-nyalo nya. Ɓa ta bwi m. Njesun zaho to iko yi lo wa gwo ɓa nmi akun m. 29Omi Dada nwa ga mi ɓa nyi, wo du Zaho-zahoi lo. Zaho ta mi wa fan mi ɓa m. 30Omi n Dada yi, yi zhin gmanyi nu.”

31Anyhudiyi ɓa ku akuta ntuge ɓa kni wo.

32Ama Yesu wa gna ɓa ge, Mi ku aɓo wo-woyi zhin nmwa ga fye, ngye shi Dada wa wu mi, fye ye fya wu mi ntu knidoyi ɓo nu nɓa miʼa?

33Ɓa gna ge, “Oho aɓo manayi zhin nu ta gna yi gna-gna m. Ama ntuge ho kpe Shekwoyi agye. Ho zhin zanyikwoci nu, ntu kni ɓei nu hoi yi hohin ge Shekwoyiʼa?”

34Yesu wa ye wa gna, “Acei ka dna lo nfye owa ge, ʼfye zhin ashekwoyi nu?” 35A ku aza yi ge ashekwoyi, oɓa nu n Shekwoyi ɓeda ɓe ɓa ɓa, Shekwoyi ɓeda kwo ta ce akatan. 36Ama Omi da, Dada la mi ze gyi-gyi-yi. Owo nu na tnu nmi yi. Mi kpe wo agye nwuna? Shi ma yi Mihin ge Shekwoyi Nugun? 37Ngye mi ta zhin omi Dada tnu-tnu num, fye to ga mi gaiciyam. 38Ama ngye mi zhin Owo atnu-tnu nu, fye ga atnu-tnu ho gaiciya, ko fye to ga mi gaiciya m, fye ɓa kpe ge, Dada dna lo nmi, Mihin ce mi dna lo n Dada.

39Ɓa ɓei ye ɓa wan wo njesun, ama wa busiya. 40Yesu wa piya lo Urdun kma, wa lo wa dna nwu vivi aba yi n Yohanna ɓo zhin batizma nyi. 41Aza nmwa begye ɓa vi wo, ɓa gna ge “Yohanna to ɓo zhin aɓo wowoyi deye pyam. Ama aɓo nwo ɓo da tu n za deye tukwo nyi ɓa ku nu.” 42Aza nmwa begye ɓa ga gaiciya ge Yesu nu zhin Gniyi.